As regurdais Vus d’ina exposiziun naziunala? Tge impressiuns As èn restadas da quella? L’emprima exposiziun naziunala ha gì lieu l’onn 1883 a Turitg. Dapi alura hai dà circa tut ils 25 onns ina tala occurrenza gronda. Mintga generaziun ha surpiglià la pussaivladad d’organisar in’exposiziun naziunala. L’ultima ha gì lieu l’onn 2002 en la regiun da trais lais Neuchâtel-Bienna-Murten, sustegnida da tschintg chantuns, repartida sin quatter lieus. Ins ha nudà passa 10 milliuns visitadras e visitaders, igl ha dà passa 13 000 preschentaziuns culturalas.
En ina democrazia madira sco la Svizra vivain nus il barat e la pussaivladad da s’exprimer regularmain davart singuls temas e da dastgar contribuir. In’exposiziun naziunala ans dat la pussaivladad da reflectar en moda profunda, vasta ed activa davart ils pli differents temas sur plirs mais e da sviluppar nossa opiniun latiers. En tge direcziun duai la Svizra ir? Co vulain nus abitar, lavurar, co esser mobils, co ans nutrir? Dumagnain nus la midada energetica? L’uman è e resta en il center, ma tge rolla duain giugar ils roboters, duai giugar l’intelligenza artifiziala?
Il temp è madir d’ans occupar da talas dumondas: en moda ludica, intellectuala, artistica. In’exposiziun naziunala reunescha las persunas da l’entira Svizra, da tut las regiuns linguisticas e culturas, da tut las generaziuns. I duai far plaschair da sa scuntrar. I duai esser in divertiment, in’aventura da crescher vi dal futur.
